15 Dekabr, 2011
Xaricdə oxuyan 29 tələbə Dövlət Proqramından xaric olunub

İndiyədək 29 nəfər “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”ndan çıxarılıb.

Bu haqda APA-ya açıqlamasında Təhsil Nazirliyinin Xaricdə təhsil və əcnəbi tələbələrlə iş üzrə sektor müdiri Əlipaşa Zeynalov bildirib. 

Ə. Zeynalov həmin tələbələrin proqramdan xaric olunmasının səbəblərini də açıqlayıb: “Onlar ya daxil olduqları ali təhsil müəssisələrindən imtina ediblər, ya da oxuya bilmədiklərinə görə universitetlərdən xaric olunublar. Bu səbəblərə görə biz də onları proqramdan xaric etmişik. Proqramdan xaric olunan tələbələrin sayı ümumilikdə 29 nəfərdir. İndiyədək dövlət proqramı üzrə xaricdə təhsil almağa göndərilən tələbələrin sayının 1204 nəfər olduğunu nəzərə alsaq, bu o qədər də böyük rəqəm deyil”.

Bütün hüquqlar qorunur  ©  SİMSAR.az | Bizi özünüzə Simsar bilin!

Saytın materiallarından istifadə yalnız administrasiyanın şifahi, ya yazılı razılığı əsasında mümkündür!