Azərbaycanda insanların müalicəsində “Muğam terapiyası”ndan istifadə olunması üçün layihə hazırlanır

Simsar.az-ın məlumatına görə, bunu Azərbaycan Milli Konservatoriyasının rektoru Siyavuş Kərimli “Tibb” qəzetinə müsahibəsində deyib. S. Kərimli bildirib ki, “Muğam terapiyası”nın effektiv təsiri əcnəbiləri Azərbaycana cəlb edəcək: “Biz bununla, Azərbaycan muğamının qüdrətini bir daha sübut etmiş olacağıq”.

S. Kərimlinin sözlərinə görə, musiqi qammasında olan səslərin insan orqanlarına müxtəlif təsiri var: “Məsələn, lya notu qaraciyərə, mədəaltı vəziyə müsbət təsir edir. Si notu ilə isə insanı hətta öldürmək olar. Biz bu nəzəriyyələri bir daha nəzərdən keçiririk”.

Rektoru onu da qeyd edib ki, bəzi həkimlər əməliyyat proseslərində musiqidən istifadə edirlər: “Hazırda cərrah dostlarım əməliyyat zamanı mənim musiqilərimdən istifadə edir, bunun effektinin yüksək olduğunu deyirlər”.