Dolunun dağıtdığı damlar üçün 80 min dam örtüyü veriləcək
Azərbaycan Fövqəladə Hallar Nazirliyi (FHN) sel və doludan zərər çəkmiş rayonlara tikinti materialları yola salıb.
APA-nın məlumatına görə, bu gün dolu yağması nəticəsində zərər çəkmiş Füzuli və Gədəbəy rayonlarına yardımın növbəti partiyası yola salınıb.
FHN-in Tikilməkdə olan Obyektlər Birləşmiş Müdiriyyətinin rəisi İbrahim Quliyev jurnalistlərə açıqlamasında bildirib ki, 3 maşında ümumilikdə 3 min ədəd şifer yola salınır.
«Mütəmadi olaraq rayon icra hakimiyyətlərinin müraciəti əsasında yerlərdə araşdırmalar aparılır. Dövlət başçısının tapşırığı əsasında həmin rayonlar lazım olan materiallarla təmin olunur», - deyə nazirlik rəsmisi bildirib.
İ. Quliyevin sözlərinə görə, bu günədək Şamaxı rayonuna 43 min, Zaqatalaya 3 min ədəd, həmçinin Ağsu rayonuna şifer materialı, taxta və şüşə yola salınıb. Ümumilikdə bütün rayonlara 80 min ədədə yaxın şifer göndərilməsi nəzərdə tutulur.