II qrup Qarabağ əlili döyüşlərdə qəhrəmanlığı ilə fərqlənib
Azərbaycanın qeyrətli oğullarından biri, Qarabağ qazisi Oruc Məmmədalıyevin vəfatından 5 il keçdi. O.Məmmədalıyev 2006-cı il, mayın 17-də yüksək qan təzyiqi ilə Topçubaşov adına Eksperimental Xəstəxanaya aparılaraq kəskin qan laxtalanmasından əməliyyat olunmuşdu. Əməliyyatdan sonra səhhəti normallaşsa da o gün axşamçağı vəziyyəti qəfildən pisləşmiş və həkimlər yenidən əməliyyat aparmalı olmuşdu.
Əməliyyat vaxtı işıqlar söndüyündən həkimlər prosesi şam işığında davam etdirmişdi. Ancaq bu əməliyyatdan sonra Oruc özünə gəlməmişdi. Həmin gün saat 20:30 radələrində O.Məmmədalıyev dünyasını dəyişdi. O, mayın 18-də Beyləqan rayonunda - atasının, bacısının və digər qohumlarının uyuduğu qəbiristanlıqda torpağa tapşırıldı.
O.Məmmədalıyev 1969-cu ildə Cəbrayıl rayonunun Şahvəlli kəndində doğulub. 1991-93-cü illərdə Qarabağda erməni işğalçılarına qarşı vuruşub. 1993-cü ildə Tuğ kəndi uğrunda gedən döyüşdə ağır yaralanıb. II qrup Qarabağ əlili, Qarabağ Əlillər Cəmiyyəti Cəbrayıl rayon şöbəsinin sədri idi.
Cəsur döyüşçü Qarabağ Əlillər Cəmiyyətinin 2001-ci ilin yanvar-fevral aylarında təşkil etdiyi ümumrespublika aclıq aksiyasının ən fəal iştirakçılardan olub. Bu aksiyaya görə 2001-ci ilin fevralında digər döyüşçü qardaşları ilə birgə həbs edilib və siyasi sifariş əsasında məhkəmə hökmü ilə 6 il azadlıqdan məhrum olunub. Bir müddət sonra o vaxtkı dövlət başçısı Heydər Əliyevin fərmanı ilə əfv edilib.
O.Məmmədalıyev həbsdən çıxandan sonra da demokratik mübarizənin ön cərgələrində dayanırdı. 2003-cü il prezident seçkilərindən sonra öyrədilmiş şəxslərin AXCP qərargahı qarşısında keçirmək istədiyi “aksiya” zamanı ANS-in kamerasını sındırmaqda ittiham edilərək həbs olundu və 4 ay Bayıl təcridxanasında saxlanıldı. Halbuki məhkəmədə Orucun bu işi törətdiyi sübut olunmadı. Buna baxmayaraq, o, məhkəmə qərarı ilə etmədiyi cinayətə görə 14 milyon manat vəsait ödədi. Məhz bu saxta ittihama görə vətən uğrunda sağlamlığını itirmiş döyüşçü 4 ay həbsdə yatarkən yüksək qan təzyiqi xəstəliyinə düçar olmuşdu. Özündən sonra O.Məmmədəliyevin vətən üçün iki yadigarı qalıb - bir oğlu, bir qızı. Allah rəhmət eləsin...
Musavat.com
Türkiyə Milli Suverenlik və Uşaq Bayramı Gününü qeyd edir
Aİ İrana qarşı sanksiyalarını davam etdirir
Xalq yazıçısı Elçin Əfəndiyevin son durumu AÇIQLANDI
Sabahın hava proqnozu
.jpg)
