Heydər Əliyevin anadan olmasının 88-ci ildönümü və Heydər Əliyev Fondunun fəaliyyətə başlamasının 7 illiyi münasibətilə keçirilən tədbirdə yüksək mükafatlar təqdim edilib 

Mayın 10-u "Buta" sarayında ulu öndər Heydər Əliyevin anadan olmasının 88-ci ildönümü və Heydər Əliyev Fondunun fəaliyyətə başlamasının 7 illiyi münasibətilə təntənəli mərasim keçirilib. 
Simsar.az-ın prezidentin rəsmi saytına istinadən məlumatına görə, prezident İlham Əliyev və xanımı Mehriban Əliyeva mərasimdə iştirak ediblər.
İlham Əliyev, xanımı Mehriban Əliyeva, ailə üzvləri və Latviyanın birinci xanımı Lilita Zatlere xatirə şəkli çəkdiriblər.
Dövlət və hökumət nümayəndələrinin, xarici ölkələrdən dəvət olunmuş nüfuzlu qonaqların iştirak etdikləri tədbir ümummilli lider Heydər Əliyevin şərəfli ömür yolunun müxtəlif anlarını əks etdirən fotoxronikanın nümayişi ilə başlayıb.
Mərasimdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva çıxış edərək müstəqil Azərbaycanın mövcud olduğu 20 il ərzində ölkəmizin böyük uğurlar qazandığını bildirib.
Azərbaycanın güclü bir dövlət olduğunu vurğulayan Mehriban Əliyeva deyib ki, biz müasir tariximizin hər bir səhifəsində dahi şəxsiyyət Heydər Əliyevin silinməz izlərini görürük. Müstəqilliyimizin ilk illərindəki kəşməkəşli vəziyyəti xatırladan Heydər Əliyev Fondunun prezidenti bildirib ki, ümummilli lider Azərbaycanı böyük bəlalardan xilas edərək, xalqa güvənərək yeni, müasir tariximizin şanlı səhifələrini yazmağa başlayıb..
Dahi şəxsiyyət Heydər Əliyevin ömür yolunun xalqa və Vətənə xidmət rəmzinə çevrildiyini vurğulayan Mehriban Əliyeva ulu öndərin adını daşıyan Fondun 7 illik fəaliyyətini xatırladbı. Azərbaycanın birinci xanımı deyib ki, Fond ötən il də bir sıra irimiqyaslı layihələr həyata keçirib.
Mehriban xanım qeyd edib ki, ötən 7 ildə Fondun ən böyük uğuru Azərbaycan xalqının inamını və hörmətini qazanmasıdır.
Sonra ümummilli lider Heydər Əliyevin fəaliyyətindən bəhs edən film nümayiş olunub.
Mərasim də prezident İlham Əliyev də nitq söyləyib.
Ulu öndər Heydər Əliyevin ölməz xatirəsinə Azərbaycan xalqının dərin hörmət və ehtiramını ifadə edən dövlət başçısı deyib ki, ümummilli lider bütün dövrlərdə doğma xalqına, Vətəninə sədaqətlə xidmət edib. Onun xidmətləri sayəsində Azərbaycan Sovet İttifaqında inkişaf baxımından ən qabaqcıl yerlərə çıxıb, ölkə həyatının bir çox sahələrində sürətli inkişaf müşahidə olunub və beləliklə, ötən əsrin 70-ci illəri tariximizdə tərəqqi dövrü kimi qalıb.
“O, Sovet İttifaqının ali rəhbərliyində təmsil olunanda da Azərbaycanın inkişafı yolunda mühüm addımlar atdı, onun vəzifədən kənarlaşdırılmasından sonra isə ölkəmiz müxtəlif problemlərlə üzləşdi, Dağlıq Qarabağda separatizm meyilləri gücləndi. Lakin Heydər Əliyevin Azərbaycana verdiyi töhfələr xalqın ürəyində yaşayırdı",- deyən Prezident İlham Əliyev bildirib ki, ulu öndər bütün dövrlərdə şərəflə yaşayıb, bütün sınaqlardan üzüağ çıxıb.
Ümummilli liderin Azərbaycanın siyasi hakimiyyətinə qayıdışını zamanın və xalqın tələbi olduğunu qeyd edən dövlət başçısı vurğulayıb ki, əgər o vaxt Heydər Əliyevin qətiyyəti, cəsarəti və siyasi nüfuzu olmasaydı, müstəqilliyimiz əldən gedə bilərdi.
1993-2003-cü illərin Azərbaycanda sabitlik və inkişaf illəri kimi tarixdə qaldığını deyən prezident bildirib ki, dövlətçiliyimizin, müstəqilliyimizin əsasları məhz 1993-cü ildə qoyulub və o vaxtdan bu günə qədər Azərbaycan yalnız inkişaf yolu ilə gedir.

Müstəqilliyin bizim üçün ən böyük sərvət olduğunu vurğulayan İlham Əliyev deyib ki, bu gün inkişaf edən, güclənən Azərbaycan Heydər Əliyevin xatirəsinə olan hörmətimizin ən gözəl nümunəsidir: “Biz bu yolla gedəcəyik. Heydər Əliyevin siyasəti Azərbaycanda yaşayacaqdır. Biz bu yoldan dönməyəcəyik, Heydər Əliyev siyasətinə daim sadiq qalacağıq”.
Çıxışların ardından Heydər Əliyev mükafatının təqdimatı olub.
Heydər Əliyev Mükafatı Komissiyasının qərarı və Prezident İlham Əliyevin 2011-ci il 10 may tarixli Sərəncamı ilə Azərbaycan ədəbiyyatının inkişafında xüsusi xidmətlərinə görə yazıçı Anar Rəsul oğlu Rzayev Heydər Əliyev Mükafatı ilə təltif olunub.
Mükafatı Anar Rzayevə dövlət başçısı təqdim edib.
Tədbirdə Heydər Əliyev Fondunun fəaliyyətindən bəhs edən film nümayiş olunub.
Daha sonra Heydər Əliyev Fondunun 2009-cu ildə təsis etdiyi "Qızıl çinar" beynəlxalq mükafatının 2011-ci il qalibləri açıqlanıb.
İlk nominasiyada qalib ümumbəşəri dəyərlərin qorunub saxlanılmasına, sivilizasiyalararası dialoqun genişləndirilməsinə, ölkəmizin YUNESKO ilə əlaqələrinin inkişafına, mədəniyyətlərarası mübadilədə Azərbaycanın uğurlu təqdimatına verdiyi töhfələrə görə YUNESKO-nun keçmiş baş direktoru Koişiro Matsuura elan olunub.
Növbəti nominasiyanın qalibi isə elm, təhsil və mədəniyyət sahəsində əlaqələrin yaradılması və xalqlar arasında dialoqun qurulmasında səmərəli fəaliyyətinə görə İSESKO-nun baş direktoru Əbdüləziz bin Osman əl-Tüveycri elan edilib.
Hər iki qalibə Heydər Əliyev Fondunun beynəlxalq mükafatını Azərbaycanın birinci xanımı Mehriban Əliyeva təqdim edib.
Mükafatlandırma mərasimindən sonra Xalq Artisti Teymur Göyçayevin rəhbərliyi ilə Qara Qarayev adına Azərbaycan Dövlət kamera orkestrinin konserti olub. Konsertdə dünya şöhrətli "İl-divo" qrupunun və Azərbaycan Dövlət Akademik Opera və Balet Teatrının solisti, istedadlı tenor Samir Cəfərovun ifaları maraqla qarşılanıb.