Sadiq Gözəlov: “Bunlar polisə qarayaxmadan başqa bir şey deyil...”
Martın 7-də RATİ əməkdaşları Mehman Hüseynovla Əbülfəz Namazov saxlanılaraq Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinə (BMCMİ) aparılıb. Saxlanılan gənclər mətbuat konfransı keçirərək bildiriblər idarədə onlara “Facebook” səhifəsindəki yazışmalarını göstərərək hədə-qorxu gəliblər: “Dedilər ki, “Böyük xalq günü”nü təşkil edənlər xaricdədir, sən də onların buradakı nümayəndəsisən. Dedilər ki, 11 martda keçiriləcək tələbə mitinqi ilə bağlı vərəqələri şəhərdə sən yayırsan. İdarənin rəisi dedi ki, biz bilirik, 11 martda keçiriləcək mitinqi ABŞ-ın Bakıdakı səfirliyi təşkil edib”.
DİN mətbuat xidmətinin rəisi Sadiq Gözəlov isə bu açıqlamaya etiraz olaraq bildirib ki, sözügedən xəbərdə haqqında söhbət gedən mitinqin ABŞ-ın ölkəmizdəki səfirliyi tərəfindən təşkil edilməsiylə bağlı guya idarə rəisinin adından deyilən fikirlər həqiqətə uyğun deyil, müəyyən qüvvələr və şəxslər tərəfindən məqsədyönlü şəkildə dövriyyəyə buraxılmış təxribat xarakterli dezinformasiyadır: “Mehman Hüseynov və Əbülfəz Namazovun Baş Mütəşəkkil Cinayətkarlıqla Mübarizə İdarəsinə aparılıb, onlara hədə-qorxu gəlinməsi və hansısa polis rəsmisinin adından mitinqi guya ABŞ səfirliyinin təşkil etməsi haqda deyilənlər ağ yalandır. Ümumiyyətlə, adları çəkilən şəxslər BMCMİ-yə aparılmayıblar. Mitinqi guya ABŞ-ın Bakıdakı səfirliyinin təşkil etməsi barədə iddialar Azərbaycan və Amerika arasında dostluq və sıx əməkdaşlıq əlaqələrinə bilərəkdən kölgə salmağa yönəlmiş uğursuz cəhddən başqa bir şey deyil”.
Sadiq Gözəlovun sözlərinə görə, M.Hüseynov və Ə.Namazov martın 7-də saxlanılaraq Nərimanov RPİ-yə aparılıblar: “Onlar 2 saata qədər idarədə olub, müvafiq araşdırmalar aparıldıqdan sonra sərbəst buraxılıblar. Burada hər iki şəxsə heç bir təzyiq olmayıb. Eyni zamanda onlara aksiyanın kimlərsə tərəfindən hazırlaması ilə bağlı konkret bir söz deyilməyib. Bir daha bildirirəm ki, bu, polisə yönəlmiş qarayaxmadan başqa bir şey deyil”.
Xatırladaq ki, sözügedən hadisə barədə ölkənin bir sıra mətbuat orqanlarında xəbər yayılıb. Saxlanılanlar bu barədə keçirdikləri mətbuat konfransında məlumat veriblər.
Sabahın hava proqnozu
Mingəçevirdə 20 yaşlı oğlan bıçaqlandı
Baş prokuror Ağdaşda qəbul keçirəcək
Aprelin 21-də 9 illik baza üzrə buraxılış imtahanı keçiriləcək
.jpg)
