Rəşid Behbudov adına Dövlət Mahnı Teatrında breykdans üzrə “Red Bull BC One” Beynəlxalq çempionatının növbəti seçmə mərhələsi keçirilib.
Simsar.az xəbər verir ki, ölkənin 16 istedadlı bi-boyları nadir təkbətək formatlı batllarda öz breykdans stilini nümayiş etdirərək “ən yaxşısı” titulu uğrunda yarışıblar.
Gərgin mübarizə şəraitində keçən “Red Bull BC One Azerbaijan Cypher-2014” seçmə mərhələsinin qalibi STIMO olub. O, Xorvatiyada keçiriləcək “Red Bull BC One” Şərqi Avropa seçmələrində ölkəmizi təmsil edəcək.
Qeyd edək ki, “Red Bull BC One” turniri ilk dəfə 2004-cü ildə İsveçrənin Bil şəhərində keçirilib. Sonrakı illər ərzində çempionatlar Almaniya, Braziliya, Cənubi Afrika Respublikası, Fransa, ABŞ, Yaponiya, Rusiya və Koreya Respublikasında keçirilmişdir. Azərbaycan iştirakçılar sırasına 2011-ci ildən daxil olub.
Hazırda “Red Bull BC One” turniri hip-hop mədəniyyətində əsas hadisələrdən biridir və bu sənət növünü populyarlaşdırmağa kömək edir. Lakin bununla bərabər əvvəlki “təkbətək” batll formatını qoruyub saxlayır.
Bütün il ərzində bi-boylar “Red Bull BC One” seçmə yarışlarının gedişində kimin güclü və həm də dünya finalında çıxış etməyə layiq olduğunu müəyyənləşdirməlidirlər. Hər ölkədən olan on altı bi-boy rəqs meydançasında kimin ABŞ, Braziliya, Əlcəzair, Finlandiya, Xorvatiya və Tayvanda keçiriləcək altı finaldan birində ölkəsini təmsil etməsinə aydınlıq gətirəcək.
Qaliblər noyabr ayında Fransada keçiriləcək dünya finalında görüşəcəklər.
Günel