Martın 12-də ümumrespublika aksiyası keçirilməsinə meriya icazə verməsə, aksiyanın baş tutmamaq ehtimalı çoxdur
Müsavat Partiyası Divanının iclası keçirilib. Partiyanın mətbuat xidmətindən musavat.com-a verilən məlumata görə, Divan martın 12-də ümumrespublika mitinqinin keçirilməsinin məqsədəuyğun olması barədə qərar qəbul edib. Həmçinin qərara alınıb ki, mitinq keçirilməsinə 5 gün qalanadək-martın 7-dək siyasi tərəfdaşlarla müzakirələr aparılsın.
Kütləvi aksiyaların keçirilməsi ilə bağlı Bakı Şəhər İcra Hakimiyyətinə də qanunvericilikdə nəzərdə tutulmuş qaydada aksiyadan 5 gün əvvəl müraciət olunacaq. Mitinq üçün hansı meydanın seçiləcəyi isə İcra Hakimiyyətinə məktub göndərilənədək müəyyənləşdiriləcək.
Müxalifət partiyaları mitinq edəcəkləri ilə bağlı dəfələrlə elan versələr də, BŞİH-yə ünvanladıqları icazə məktubuna müsbət cavab almadıqlarına görə, aksiyaları təxirə salmağa məcbur olublar.
Bu dəfə necə, aksiya baş tutacaqmı? hələ ki bu sualın cavabı açıq qalır.