Simsar.az xəbər portalının məlumatına görə, Türkiyədə mərhum Azərbaycan şairi Bəxtiyar Vahabzadənin vəfatının 2-ci ildönümünə həsr olunmuş Türk dünyası uluslararası şeir müsabiqəsi yekunlaşıb.
İstanbul Şeir Akademiyasının təşkil etdiyi nüfuzlu müsabiqədə Milli.Az xəbər portalının yazarı, AYB üzvü, şair Əvəz Qurbanlı da qaliblər sırasında olub.
Bütün türkdilli respublikaların qatıldığı yarışmada 118 şairin 200-dən artıq şeiri seçilərək qəbul edilib. İki Azərbaycan şairinin adı isə ilk onluğa düşüb – Əvəz Qurbanlı və Rəsmiyyə Sabir. Ümumi sırada Əvəz Qurbanlı 7-ci, Rəsmiyyə Sabir isə 10-cu yerdə qərar tutub.
Mükafatlar fevralın 18-də - B.Vahabzadənin vəfatının 2-ci ildönümündə İstanbulun Topqapı Kültür Mərkəzində qaliblərə təqdim ediləcək.
Bu barədə danışan Ə.Qurbanlı, nüfuzlu müsabiqədə mükafata layiq görüldüyünə sevindiyini bildirsə də, müəllifi olduğu “Xocalı baharı” adlı şeirinin daha yüksək qiymətə layiq olduğunu deyir: “Əlbəttə, bütün türkdilli ölkələrin iştirak etdiyi müsabiqədə 200-dən artıq şeir arasında 7-ci yer çox yaxşı nəticədir. Əgər indiyədək yazdığım şeirlərdən hər hansı biri bu mükafata layiq görülsəydi, çox sevinərdim. Ancaq hesab edirəm ki, “Xocalı baharı” adlı son şeirim ən azı, onluğun 3-cü pilləsində olmalı idi. Bunu mən yox, həmin şeirlə tanış olan türk və azərbaycanlı filoloqlar deyir. Mən “Xocalı baharı”nı yazandan sonra anladım ki, ömrümdə ən mükəmməl şeirlərimdən birini, bəlkə də birincisini yazmışam”.
Ə.Qurbanlı hesab edir ki, münsiflər onunu şeirinə qarşı ya çox biganə olublar, ya da qərəzli mövqe tutublar: “Yaxın günlərdə hər şey üzə çıxacaq. Belə ki, müsabiqədə iştirak edən bütün şeirlərin bir antologiyada toplanaraq dərc olunması nəzərdə tutulur. O zaman, ilk yerlərin hansı şairlərə və şeirlərə verildiyi məlum olacaq. Bundan sonra, həmin şeirlərlə “Xocalı baharı”nın müqayisəli elmi-bədii təhlilinin aparılması üçün hər iki ölkədən olan mütəxəssislərə təqdim etmək fikrim var”.
Türkiyə Milli Suverenlik və Uşaq Bayramı Gününü qeyd edir
Aİ İrana qarşı sanksiyalarını davam etdirir
Xalq yazıçısı Elçin Əfəndiyevin son durumu AÇIQLANDI
Sabahın hava proqnozu
.jpg)
