Gömrük Məcəlləsinin yeni layihəsi parlamentdə müzakirə ediləcək

Milli Məclisin yaz sessiyasında Gömrük Məcəlləsinin yeni layihəsi müzakirə ediləcək. Sənəd dövlət başçısının imzası ilə parlamentə 8 yanvarda daxil olub.

İqtisadi siyasət üzrə parlament komitəsinin sədri Ziyad Səmədzadənin sözlərinə görə, 355 maddədən ibarət qanun layihəsi hər şeydən əvvəl rəqabət üzərində dövlət nəzarətinin təkmilləşdirilməsini nəzərdə tutur. Xəzər-Avropa inteqraiya işgüzar klubunun (CEIBC) iclasında çıxış edərkən o bildirib ki, yeni variantda qanun layihəsində dövlət orqanlarının idxal-ixrac əməliyyatlarında optimal iştirakı nəzərdə tutulur.
Onun sözlərinə görə, sahibkarlığın inkişafına əngəl olan amillərin aradan qaldırılması üzrə dövlətin funksiyaları daha vacibdir. Bu həm də ona görə vacibdir ki, ölkə dünya iqtisadiyyatına sıx inteqrasiya olunub. Amma sənəddə dünyanın qloballaşması fonunda Azərbaycanın maraqlarına ziyan vuracaq maddələr olmamalıdır, deyə deputat əlavə edib. --17D—