Görkəmli alimin məzarını ziyarət etdilər
Bu gün AMEA akademik Ziya Bünyadov adına Şərqşünaslıq İnstitutunun, Ailə, Qadın və Uşaq Problemləri üzrə Dövlət Komitəsinin kollektivləri, respublikanın qadın ictimaiyyətinin nümayəndələri II Fəxri Xiyabanda görkəmli şərqşünas alim Aida İmanquliyevanın məzarını ziyarət ediblər. Onlar alimin xatirəsini dərin ehtiramla yad edib, məzarı üzərinə gül və əklil qoyublar.
AMEA-dan SalamNews-a verilən məlumata görə, Şərqşünaslıq İnstitutunun direktoru, Milli Məclisin deputatı Gövhər Baxşəliyeva və Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxış edərək anadan olmasının 72-ci ildönümü qeyd edilən Aida İmanquliyevanın həyat yolundan, zəngin və dəyərli elmi fəaliyyətindən danışıblar.
Anma mərasimində A.İmanquliyevanın şərqşünaslıq elminə verdiyi töhfələrdən söz açılıb, böyük alimin müasir ərəb ədəbiyyatının tədqiqində gördüyü işlər vurğulanıb.